بلد الهاربنين

يا مصر

يا بلد الهاربنين

التعبانين الكاحينين

العريانين المشتاقين

للماه و الصحبه

يا مصر

يا أم المستحملين

الهم و الخوف

من بكره

الفرحانين بالهروب

من سجنيك القاسي

المشتاقين للقاعده

علي كراسي

من عاج و فسيفساء

متشخصيلنا الداء

يا أم التاريخ

و الحكمه المنسيه

يا محنيه علمك

بدمي

و مسوداه بموتي

و مبيضاه بصوتي

أذا تموتي

فأنا صرختي

ف سكوتي

و أذا تكوني

يلمع قوي

لوني

و يشتد عودي

كما الوتد

واقف جبل

و أحتمل

ألف شيء

لا يحتمل

حتي الملل

حتي الرحيل

لكن فراقك

مستحملوش

مستلطفوش

فعودي تاني

و أنهضي

أرجعي "كمي

"جيبتوس

محروسه

م العين و الحسد

عودي كنانه

الرب العظيم

و ضمي ف ولادك

و لملميهم

قبل الشتات

فات الفات

الوقت بيجري

من سكات

و أنتي محتاجه

الثبات

ع الحق

حبه أثبتي

و ضمي ايدينا

و بلسمي

جرحي الدامي

من زمان

و بسملي بأسم

رب الكون

و حسبني

علي الباع

ولادك الطيبين

ف سوق النخاسه

و للدجالين

مين بس مين

يقدر يداري

همنا

التوهه وخدانا

و سرقنا الطوفان

يرمي الغلابه

غرقانين

قدام

شطوط تركيا

تحدفهم الموجه

العافيه

عريانين

قدام باليرمو

يخطفهم القرش

اللعين للبحر الأحمر

و ال نجي للشطوط

حلم يفوت

بالعمر في موال الغنا

دخل هنا

قصر الثقافه المحرقه

هرب في قطر الصعيد

أتحرق من خوفه

و أتكسر

في مترو حلوان

حلمه للوصول

لأن السايق

مكنش فرعون

أسمه "خوفو

خرجت للنور

الأحد 23\12\2007

13 ذو الحجه 1428