ف الحلميه

ف الحلميه

هناك و أنا ماشي

عدي عمري

في راسي

ف لحظه

شوفت ملامحي

و هي بتتكون

و رجعت جوا

ف عقلي

تركيبه الصوره

لملمت جذوري

ف لحظه

بهجه و دفا

و لما

ف حر العمر

بتظهر

و بترسملك صوره جميله

دعبست في عقلي

ظهرت صوره

كنت فوق السفره

و أمي و أبويا و أخويا

و عماتي و جدي

كله بيضحك

ف بيتنا

ف الحلميه

وجدي

بينطني فوق رجله

و بيعشق أيده

ف أيدي

و بيرفعني برجله

فوق الدنيا

و أنا بضحك

و أنا ماسك أيده

كأني موصول

ببدايه الرحله

و بأخد أمر

بأني أكمل

و أخطي كل حدود الحاضر

و أخد كل الماضي

و أكمل بكره

جدي كان

بيسقيلي البسكوت

بالشاي بحليب

و يمسك أيدي

و ننزل نتمشي

نجيب كوكاكولا

و حليب من أبو ربع جنيه

و قوله عايز

أروح جامع قيسون

و أتمشي ف سوق المناصره

و أشوف مصر

جوامع و زحمه

و ناس بتضحك

رغم بشاعه الصوره

جدي كان بيحب

يسمع نكتي

الصغيوره

و نقعد ف البرج

و يعدي مسحراتي

يقول

أصحي يا ميزو

واحد الدايم

أصحي يا ميزو

وحد الرزاق

كلمته كانت

ترياق

بيرسم علي وشي

ضحكه

و عماتي تحضني

و تضحك

و اقولهم

هجوزكو أيمن شوقي

لاعيب الكوره

كانت أجمل صوره

و دلوقتي

لما بروح نواحي

البيت ف الحلميه

مبلقاش البيت

أتزال ف الزلزال

و سابني

أكمل مشواري

و أنا مشروخ

بس أجمل حاجه

لقيتها

كشك البسكوت

ال لسه بسقيه

ف أي مشروب

و بواصل

ربط الماضي ببكره

و بروح لبدايه الرحله

و أنا ف الحاضر

علشان أبقي

قادر

أواجه بكره

خرجت للنور

21\7\2008